أهلاً
خلال 4 شهور الماضيه الكل صار يتكلم عن الترا HD فاونديشن من ميك اب فور ايفر سواءً العادي او الستيك
اولاً نوع بشرتي دهنيه ف من الطبيعي اني أميل للفاونديشن المات لكن اوقات اخذ اللي يعطي لوك ساتين ( بين المات والديوي)
لكن فالشتاء تصير مختلطة ف صرت اخذ الساتين فالشتاء ما اضطر اني اثبته فباودر او عادي اثبته اول ما أحط الفاونديشن بعدها ما يدَهن .. اما فالصيف ف أستعمل فاونديشن مات او ساتين واستعمل ماتيفاينق برايمر و أثبته بمثبت من اربن ديكاي وبين فتره وفتره اسوي تتش اب بالبادور
بعد هالمقدمه الطويله بتكلم عن الفاونديشن من جميع النواحي
* تغطيته :
خفيف الى متوسط , والمميز فيه انك تقدرين تبنين طبقات بدون ما يبين انك حاطه اكثر من طبقه
بالنسبه لبشرتي ما فيها حبوب او مشاكل تستاهل اني استعمل فاونديشن فُل كفر .. تطلع لي حبوب بين فتره وفتره وحلها بسيط أستعمل كونسيلر وأخفيها
مناسب كيومي او سهرات ؟ كلهم
1- يومي : جداً خفيف واستعمله فالدوام وجداً طبيعي ويبين وجهي طبيعي ومناسب للصباح ومن الأشياء اللي انصح فيها للدوام
2- سهرات : كمان مناسب لكن لبنات معينين , لمين ؟ للي ما تحب الفاونديشن الثقيل زي دبل وير من ايستي لودر
يعني انا زي ما قلت فوق ما احب الفاونديشن الثقيل استعمل كونسيلر ويفّي بالغرض وكمان تقدرين تبنين أكثر من طبقه بدون يبين لوك كيكي + ويناسب البنات اللي بشرتهم بيرفكت ما تحتاج كفر
* نوعه :
ساتين مو مات ولا ديوي
يناسب كل البشرات
1- الجافه : تحتاج ترطيب او برايمر
2- الدهنيه : ماتيفاينق برايمر + تثبيت بالباودر
* ثباته :
جربته لأطول فتره اللي هي من 6 الصباح الى 6 المغرب
من أول ما تحطينه الى 4 ساعات ثابت (ثبته اول ما حطيت الفاونديشن بالباودر على خفيف ) من بعدها بدأ يختفي من عند الانف (منطقه التي زون) ! بعدها كم ساعه بدأ يختفي من عند الخد والذقن
* درجاته :
أحب اشكر ميك اب فور ايفر على انهم وفرو كل الدرجات من البشرات البيضاء الى الغامقه والاندرتونز "الاصفر , البينك"
مستحيل ما تحصلين درجتك
ملاحظة : اذا بتجربين اي فاونديشن جربيه على وجهك حتى لو كان مو مهيأ انك تكشفين خوذي عينه وجربيه
+ جربيه بمنطقه حوالين الفم لان أغلبيه البنات عندهم هالمنطقه أغمق بدرجه من لون بشرتهم الأساسي ف تاخذ درجه تناسب لونها بس منطقه الفم يقلب رمادي , خوذي اغمق بدرجه فقط .. وحاليأَ سيفورا العليا في الدور العلوي قسم كامل لميك اب فورايفر وبينفيت وطاقم نسائي تقدرين تجربين وتاخذين راحتك .
* طريقه توزيعه :
بيوتي بليندر كيومي وتغطيه خفيفه
سيقما F80 + اطبطب بالبيوتي بليندر
ريل تكنيك pointed foundation brush + اطبطب فالبيوتي بليندر
السؤال الأهم : هل يستاهل اني اشتريه ؟
بالنسبه لي كتجربه حلو وعاجبني انه يناسب يومي وسهرات والميزه تناسب البنات اللي ما عندهم المقدره الماديه يشترون أكثر من فاونديشن ف سعره نفس قيمه (فاونديشن يومي , وسهرات)
لكن هل راح أرجع اشتريه ؟ ممكن مع انه عندي اكثر من فاونديشن وكمان فالسوق موجود مثله والاحسن منه
ما تحبين يكون عندك منتجات كثيره ميك اب ؟ ماعندك المقدره الماديه انك تشرين نوعين من الفاونديشن
؟ تحبين الفاونديشن الطبيعي واللي تقدرين تبنين أكثر من طبقه ؟ بشرتك طبيعتها حلوه وما تحتاج كفر ؟
اذا أيه , اشتريه وراح يناسبك
اما اذا بشرتك فيها مشاكل , تحبين التغطيه الثقيله لسهرات , بشرتك جداً دهنيه ؟ ف أختاري فاونديشن ثاني
أتمنى أني أكون تكلمت عنه بشكل مفصل وشرحته بكل صراحه ..
شكراً لقرائتك البوسَت .. أتمنى لك يوم سعيّد
حساباتي فالسوشال ميديا يمين المدونه
ليست هناك تعليقات:
إرسال تعليق